Junket

Bukas ang huling araw ng isang engrandeng junket na kilala sa tawag na PVMA Convention. Ginaganap ito sa Sofitel/Philippine Plaza Hotel sa tabing dagat, malapit sa higanteng Mall of Asia. Akala ko mas magiging mas maganda ang convention this year kasi sa Manila ang venue pero di rin pala dahil, katulad ng title ng post kong ito, junket lang talaga sya. Isang araw lang ang scientific fora, at bukas pa ito gaganapin. Maniniwala ba kayong ang unang araw e registration lang? Registration lang talaga sya. Swerte ng mga iniisponsor ng mga kompanya ng bakuna at gamot dahil may malapit silang hotel na matutuluyan pero kawawa ang mga tulad kong kailangang mag-uwian. Haaay, kung pwede lang iwasang gumamit ng bakuna at gamot e gagawin ko dahil wala man lang nag-alok na sponsoran ako. Mabuti na rin siguro, at least, wala akong pinagkakautangan ng loob, at di nila ako pwedeng piliting gumamit ng produkto nila (na walang kwenta naman talaga ang iba).
Maraming exhibits dun pero napakaliit naman ng venue kaya mahirap maiwasang mabati ang mga taong ayaw batiin at pansinin. Sabi nga ng isang brod kong ayaw pumunta, kaya daw ayaw nyang pumunta e dahil ayaw nyang makipagplastikan. May punto sya di ba?
May maganda nga palang pangitain dun kanina kasi media presentation ng Bb Pilipinas dun. Ayus ang parada nila sa tabingdagat habang lumulubog ang araw! Ang ganda ng contrast.
Bukas ang hinahabol kong mapakingan ay ang talumpati ni Dr. Too, isang Malaysian na eksperto sa hog cholera at PCV. Narinig ko na sya dati sa Asian Pig Veterinary Society at ayus ang mga points nya tungkol sa epidemiology, transmission at control ng nasabi kong mga sakit. Isa pang inaabangan ko e ang lecture ni Dr. Masangkay na dati kong guro sa Pathology sa UPLB. Magaling sya sa environmental science at sa exotics at nakakaaliw ang mga pinagsasabi nya. Sa kanya ko unang narinig yung kay Dracula, na may rabies daw si Dracula dahil lahat ng signs ng rabies e meron sya (di makalunok kaya naglalaway, nangangagat, takot sa liwanag, naghahawa, atbp.). Na kaya daw di sya namatay e baka di pa nakakamatay ang rabies nung mga panahong yun o baka ibang strain yung ng rabies kesa sa uso ngayon.





-----
Maraming salamat nga pala sa link mula sa What's upLB.
-----
Ngayong Byernes, pagkakuha ko ng Certificate of Attendance tumalilis na ko. Ok naman ang plenary session kanina.